अंकुश शिंदे यांची महाराष्ट्र राज्य पत्रकार महासंघाच्या अहिल्यानगर जिल्हाध्यक्षपदी निवड
अहिल्यानगर | दि. ०२ सप्टेंबर २०२६
गणेश कविटकर
पत्रकारितेतील सातत्यपूर्ण योगदान, व्यावसायिक निष्ठा आणि सामाजिक बांधीलकीची दखल घेत अंकुश तुकाराम शिंदे यांची महाराष्ट्र राज्य पत्रकार महासंघाच्या अहिल्यानगर जिल्हाध्यक्षपदी निवड करण्यात आली आहे. महासंघाच्या अधिकृत आदेशानुसार त्यांची नियुक्ती १ सप्टेंबर २०२६ पासून प्रभावी झाली आहे.
पत्रकारिता ही केवळ बातमी देण्याचे माध्यम नसून समाजातील प्रश्नांना वाचा फोडण्याचे आणि सामान्यांच्या न्याय्य हक्कांसाठी आवाज उठविण्याचे प्रभावी साधन आहे. या भूमिकेची जाणीव ठेवून पत्रकारांच्या प्रश्नांसाठी संघटितपणे काम करण्याची महत्त्वपूर्ण जबाबदारी आता अंकुश शिंदे यांच्या खांद्यावर सोपविण्यात आली आहे.
जिल्ह्यातील पत्रकारांचे हक्क व हित जपणे, पत्रकारांना भेडसावणाऱ्या विविध प्रश्नांना संघटितपणे वाचा फोडणे, पत्रकारांचे संरक्षण आणि कल्याण यासाठी प्रयत्न करणे तसेच महासंघाची संघटनात्मक ताकद अधिक भक्कम करणे, या दिशेने ते काम करणार आहेत. बदलत्या काळातील पत्रकारितेसमोरील आव्हाने लक्षात घेऊन पत्रकारांमध्ये एकजूट निर्माण करण्यावरही त्यांचा भर राहणार आहे.
या निवडीबद्दल पत्रकारिता क्षेत्रातून त्यांचे अभिनंदन होत असून, सहकाऱ्यांनी शाल व पुष्पगुच्छ देऊन त्यांचा सत्कार केला. यावेळी उपस्थितांनी त्यांच्या पुढील कार्यासाठी शुभेच्छा व्यक्त केल्या. पत्रकारांच्या प्रश्नांसाठी आवाज अधिक बुलंद करण्याची आणि संघटनेला नवी दिशा देण्याची संधी मिळाल्याने अंकुश शिंदे यांच्या निवडीकडे जिल्ह्यातील पत्रकारांचे लक्ष लागले आहे.
