श्रीगोंदा | दि. ०७ जुलै २०२६
गणेश कविटकर
“मोठी स्वप्ने पाहण्यासाठी मोठे वय लागत नाही; लागते ती फक्त जिद्द, चिकाटी आणि स्वतःवरचा विश्वास.” या विचाराला साकार रूप देत श्रीगोंदा तालुक्यातील चिमुकली खेळाडू कु. आर्वी विशाल आढाव हिने राज्यस्तरीय तायक्वांदो स्पर्धेत उल्लेखनीय यश संपादन करून संपूर्ण तालुक्याचा अभिमान उंचावला आहे.
अहिल्यानगर येथील जिल्हा क्रीडा संकुल, वाडिया पार्क येथे ३ ते ५ जुलै २०२६ दरम्यान झालेल्या खुल्या राज्यस्तरीय तायक्वांदो अजिंक्यपद स्पर्धेत शिवाजीराव नागवडे इंग्लिश स्कूलच्या विद्यार्थिनी आर्वीने ८ वर्षांखालील २० किलो वजनी गटात कांस्यपदक जिंकत आपल्या अथक मेहनतीचे सोनं केलं.
प्रत्येक विजयामागे अनेक दिवसांचा सराव, असंख्य घामाचे थेंब आणि कधीही हार न मानणारी जिद्द दडलेली असते. वयाने लहान असली तरी मोठ्या खेळाडूंनाही प्रेरणा देईल, अशा आत्मविश्वासाने आर्वीने स्पर्धेत दमदार खेळी करत राज्याच्या क्रीडा क्षेत्रात स्वतःची वेगळी ओळख निर्माण केली.
शैक्षणिक गुणवत्तेबरोबरच विद्यार्थ्यांमधील क्रीडा कौशल्याला प्रोत्साहन देणाऱ्या शिवाजीराव नागवडे इंग्लिश स्कूलने पुन्हा एकदा आपल्या संस्कारक्षम आणि गुणवत्तापूर्ण शिक्षणाची साक्ष दिली आहे. विद्यार्थ्यांच्या सर्वांगीण विकासासाठी सातत्याने केले जाणारे प्रयत्न आज या यशाच्या रूपाने फळाला आले आहेत.
या यशाबद्दल संस्थेचे अध्यक्ष राजेंद्रदादा नागवडे, विश्वस्त अनुराधाताई नागवडे, निरीक्षक एस. पी. गोलांडे, मुख्याध्यापिका नीतू दुलानी, शिक्षक, प्रशिक्षक व कर्मचाऱ्यांनी आर्वीचे मनःपूर्वक अभिनंदन करत तिच्या उज्ज्वल भविष्यासाठी शुभेच्छांचा वर्षाव केला.
आर्वीच्या या यशामुळे श्रीगोंदा तालुक्यात आनंदाचे वातावरण निर्माण झाले असून, “आजचे कांस्य उद्याच्या सुवर्णपदकाची नांदी ठरेल,” असा विश्वास नागरिक व्यक्त करत आहेत. राष्ट्रीय आणि आंतरराष्ट्रीय स्तरावर भारताचा तिरंगा अभिमानाने फडकविण्याची क्षमता या चिमुकलीत असल्याचे मत क्रीडाप्रेमींनी व्यक्त केले.
आर्वीच्या या उल्लेखनीय यशामागे तिचे तायक्वांदो (कराटे) प्रशिक्षक जय आनंदकर यांचेही मोलाचे मार्गदर्शन लाभले आहे. नियमित सराव, शिस्त, आत्मविश्वास आणि स्पर्धेतील तांत्रिक कौशल्य विकसित करण्यासाठी त्यांनी घेतलेल्या अथक परिश्रमांमुळेच आर्वीने राज्यस्तरावर दमदार कामगिरी करत कांस्यपदकावर आपले नाव कोरले. विद्यार्थ्यांमधील क्रीडा गुणांना योग्य दिशा देत त्यांना मोठी स्वप्ने पाहण्याची प्रेरणा देणारे प्रशिक्षक जय आनंदकर यांचे योगदान या यशामध्ये अत्यंत महत्त्वपूर्ण मानले जात आहे.
आज आर्वीने जिंकलेले कांस्यपदक हे केवळ एक पदक नाही, तर प्रत्येक ग्रामीण भागातील विद्यार्थ्यांसाठी आशेचा किरण आहे. परिस्थिती कितीही सामान्य असली तरी मोठी स्वप्ने, कठोर परिश्रम आणि सातत्यपूर्ण प्रयत्न यांच्या जोरावर अशक्य वाटणारे ध्येयही सहज गाठता येते, याचा जिवंत आदर्श आर्वी आढाव ठरली आहे. तिची ही यशोगाथा असंख्य विद्यार्थ्यांच्या मनात नवी उमेद, नवी ऊर्जा आणि यशाची नवी प्रेरणा निर्माण करणारी आहे.
