कुंभळी (ता.कर्जत, जि. अहिल्यानगर ) –
अंधःकारावर प्रकाशाचा, अशुभावर मंगलतेचा आणि दुःखावर श्रद्धेचा विजय साजरा करण्याचा दिवस — दीपोत्सव! अशा या मंगल क्षणी बुधवार, दि. ५ नोव्हेंबर २०२५ रोजी कानिफनाथ मंदिर, कुंभळी येथे भक्तिमय वातावरणात दीपोत्सवाचा भव्य सोहळा अत्यंत उत्साहात पार पडला.या पवित्र कार्यक्रमाचे आयोजन ॐ चैतन्य कानिफनाथ महाराज ट्रस्ट व समस्त ग्रामस्थ कुंभळी यांच्या वतीने करण्यात आले होते. कार्यक्रमाची सुरुवात ह.भ.प. सुदाम कान्हा गोरखे गुरुजी यांच्या शुभहस्ते पहिला दिवा प्रज्वलित करून झाली. त्या क्षणी संपूर्ण मंदिर परिसर भक्तीच्या भावनेने दुमदुमून गेला.
दीप प्रज्वलनानंतर गुरुजींनी उपस्थित भाविकांना दीपोत्सवाचे महत्त्व सांगताना भावनिक शब्दांत मार्गदर्शन केले. त्यांनी म्हटले “प्रत्येक दिवा म्हणजे आशेचा किरण आहे. हा प्रकाश केवळ बाहेर नाही तर आपल्या अंतःकरणातही उजळावा, हाच कानिफनाथ महाराजांचा संदेश आहे.”या नंतर सायंकाळी सात वाजता हजारो दिव्यांच्या प्रकाशाने मंदिर परिसर दैदीप्यमान झाला. फुलांनी आणि रांगोळ्यांनी सजलेले प्रांगण, घंटानाद, आणि भक्तांच्या जयघोषांनी वातावरण भक्तिभावाने भारले.
संध्याकाळी ‘स्वरसाधना संगीत मंच’ यांच्या वतीने सादर झालेल्या हिंदी–मराठी भक्तिगीतांच्या कार्यक्रमाने भाविक मंत्रमुग्ध झाले. संगीताच्या सुरांमध्ये भक्ती, प्रेम आणि आनंदाचा संगम अनुभवता आला. कार्यक्रमानंतर फलाहार समारंभ पार पडला. गावातील सर्व वयोगटातील भाविकांनी एकत्र बसून प्रसादाचा आस्वाद घेतला आणि उत्सवाला एकात्मतेचा स्पर्श दिला.
दरवर्षीप्रमाणे यंदाही दीपोत्सवाने कानिफनाथ मंदिर परिसराला केवळ उजळविले नाही, तर श्रद्धा आणि भक्तीचा दीप प्रत्येकाच्या अंतःकरणात पेटवून गेला.
